Verkhlutar og verkþættir

Tímar, akstur, lager og tæki eru skráð á verkhluta, svo þú sérð hvað hver hluti verksins hefur kostað.

Athugið

Verkhlutar eru hluti af pakkanum Allur pakkinn. Í Einfalda pakkanum er ekki valið um verkhluta þegar verkefni er stofnað, og hvert verkefni fær einn verkhluta sjálfkrafa.

Hvar verkhlutar koma fram

• Skráningar: þegar tími, akstur, lager eða tæki er skráð á verkið þarf að velja verkhluta. Hafi verkefnið aðeins einn verkhluta velur Unnur hann sjálf.
• Spjaldið Verkþættir á verkefnasíðunni: upphæð á hverjum verkhluta, sjá neðar.
• Sölureikningar: með stillingunni Sýna verkhluta á reikningum eru línur reiknings flokkaðar eftir verkhlutum.
• Skýrsla verkefnis: hægt er að hópa skráningar eftir verkhluta, sjá Skýrsla verkefnis.

Ný tímaskráning. Velja þarf verkhluta í reitnum Verkhlutur.

Veljirðu engan verkhluta þegar verkefnið er stofnað býr Unnur til einn sem heitir eftir verkefninu með „-Almennt“ aftast. Sjá Stofna verkefni.

Bæta verkhluta við verkefni

Stjórnandi, Skrifstofumaður og Verkstjóri geta bætt verkhlutum við verkefni.

1. Opnaðu verkefnið og veldu Breyta í þriggja punkta valmyndinni efst til hægri.

2. Smelltu á Verkhlutar verkefnis til að opna hlutann. Verkhlutarnir sem eru þegar á verkinu sjást efst.

3. Fyrir neðan reitinn Leita eða slá inn nýjan verkhluta… eru heiti sem hafa verið notuð áður í fyrirtækinu. Smelltu á heitið sem á við, eða sláðu inn í reitinn til að þrengja listann.

4. Sé heitið ekki til birtist + Búa til verkhluta með heitinu sem þú slóst inn. Smelltu á það.

   

   Fimm verkhlutar á verkinu. Heitið Útilýsing er ekki til, svo Unnur býðst til að búa það til.

5. Smelltu á Vista.

Heiti verkhluta eru sameiginleg fyrir allt fyrirtækið. Þegar þú býrð til nýtt heiti verður það til um leið og þú smellir á + Búa til verkhluta, og það kemur upp sem tillaga á öðrum verkefnum líka. Verkhlutinn fer hins vegar ekki á verkefnið fyrr en þú vistar.

Fjarlægja verkhluta af verkefni

Opnaðu Breyta, smelltu á × við verkhlutann undir Verkhlutar verkefnis og vistaðu.

Varúð

Ekki er hægt að fjarlægja verkhluta sem hefur tímaskráningar, akstur eða lagerfærslur. Unnur vistar þá aðrar breytingar á verkefninu en sýnir villuna Ekki er hægt að eyða verkhluta sem er með tímaskráningar, akstur eða lagerfærslur. Færðu skráningarnar fyrst á annan verkhluta.

Tækjaskráningar stöðva þetta ekki. Færðu þær á annan verkhluta áður en þú fjarlægir hann, annars sitja þær eftir á verkhluta sem er ekki lengur á verkinu.

Verkþættir

Á Yfirliti verkefnasíðunnar er spjaldið Verkþættir með einu spjaldi fyrir hvern verkhluta og samanlögðu virði þess sem hefur verið skráð á hann: tíma, akstri, efni og tækjum. Spjaldið birtist aðeins ef verkið hefur fleiri en einn verkhluta, og aðeins Stjórnandi og Skrifstofumaður sjá það.

Verkþættir á verkefni með fimm verkhluta.

Smelltu á verkþátt til að opna síðu hans. Þar eru sömu tölur og efst á verkefnasíðunni, en aðeins fyrir þennan verkhluta, og flipinn Skráningar sýnir aðeins skráningar á hann.

Síða verkþáttarins Raflagnir.

Efni af aðfangareikningum sem er skráð á verkefnið en engan verkhluta telst ekki með á neinum verkþætti.