Studdar bókhaldstengingar

Sölureikningar sem þú sendir úr Unni fara inn í bókhaldskerfið þitt. Tenginguna setur Stjórnandi eða Skrifstofumaður upp einu sinni, undir Stillingar›Tengingar›Bókhaldskerfi, og hún fylgir báðum pökkum, Einfalda pakkanum og Allur pakkinn.

Í reitnum Þjónustuaðili eru sjö kostir: Payday, DK Plus, Regla, Konto, Catacloud, Uniconta og Tölvupóstur á bókara. Aðeins eitt kerfi er tengt í einu. Vistirðu annað kerfi kemur það í stað þess fyrra.

Hvað fer á milli kerfanna

	Payday	DK Plus	Regla, Konto, Uniconta	Catacloud	Tölvupóstur á bókara
Sölureikningar	Drög	Drög	Drög (sölupöntun í Uniconta)	Drög	Tölvupóstur til bókarans
Sækja verkkaupa	Já	Já	Já	Já	Nei
Sækja starfsfólk og vörur	Já	Já	Nei	Nei	Nei
Sækja útgjöld sem aðfangareikninga	Já	Já	Nei	Nei	Nei
Senda launagögn	Já	Nei	Nei	Nei	Nei
Sækja greiðslustöðu sendra reikninga	Já	Nei	Nei	Nei	Nei
Aðfangareikningar koma gegnum tenginguna	Nei	Nei	Nei	Já	Nei

Með hinum kerfunum geta rafrænir aðfangareikningar borist gegnum Unimaze, sjá Rafrænir reikningar.

Sölureikningar

Þegar þú sendir reikning fer hann inn í bókhaldskerfið sem drög. Þar yfirferðu hann og gefur hann út, og bókhaldskerfið sendir hann svo verkkaupanum. Sé verkkaupinn ekki til í bókhaldskerfinu stofnar Unnur hann þar fyrst, eftir kennitölu. Hvernig rofarnir Senda tölvupóst og Senda rafrænan reikning virka er lýst í Sending reiknings og netföng verkkaupa.

Bókhaldskerfið fær línurnar samandregnar. Tímar koma sem ein lína á hvern starfsmann og taxta. Akstur, efni, tæki og verkfæragjald koma sem ein lína hvert á hvert VSK-þrep. Línur á tilboðsreikningum fara óbreyttar, hver fyrir sig. Sundurliðunin er á PDF-fylgiskjalinu sem Unnur býr til. Lagervörur geta farið stakar með vörunúmeri ef þú notar Payday eða DK, sjá Birgðahald og bókhaldskerfi.

Hafirðu ekkert bókhaldskerfi tengt geturðu samt merkt reikning sendan, sjá Sölureikningar.

Annað sem tengingin gerir

• Verkkaupar: um leið og þú vistar tengingu (eða tengir Payday eða Catacloud) sækir Unnur viðskiptavinina úr bókhaldskerfinu og sýnir hve margir komu inn. Verkkaupar sem eru þegar til breytast ekki. Sjá Verkkaupar.
• Starfsfólk: sjá Koma starfsmanni inn í Unni.
• Vörur: sjá Lagervörur.
• Útgjöld: handskráð útgjöld úr Payday eða DK má taka inn sem aðfangareikninga, sjá Skrá aðfangareikning.
• Launagögn: sjá Taka út tíma fyrir launakeyrslu.
• Greiðslustaða: á hverri nóttu athugar Unnur í Payday hvort sendir reikningar hafi verið greiddir. Þegar reikningur er greiddur birtist „Sölureikningur greiddur“ í sögu verkefnisins, sjá Verkefnasíðan. Í listanum yfir sölureikninga sést ekki hvort reikningur er greiddur. Með hinum bókhaldskerfunum sækir Unnur enga greiðslustöðu.

Tengja bókhaldskerfið

Tengingar › Bókhaldskerfi. Payday er tengt með hnappnum Tengja við Payday.

Payday

1. Farðu í Stillingar›Tengingar›Bókhaldskerfi og veldu Payday í Þjónustuaðili.
2. Smelltu á Tengja við Payday.
3. Skráðu þig inn hjá Payday og samþykktu tenginguna. Þú kemur aftur í Unni og þar stendur Tengt við Payday.

Eldri leiðin er tengillinn Tengja með Client ID og Secret. Þá býrðu til samþættingu í Payday undir Stillingar › Fyrirtæki › Samþættingar, afritar Client ID og Client Secret í reitina og smellir á Vista. Mundu að smella á Staðfesta í Payday eftir að samþættingin er búin til.

DK Plus

1. Sendu tölvupóst á [email protected] og óskaðu eftir API lykli.
2. Veldu DK Plus í Þjónustuaðili og settu lykilinn í API lykill (Bearer Token).
3. Smelltu á Vista.

DK Plus. Vörunúmerin birtast þegar lykillinn er kominn í reitinn.

Undir Vörunúmer í DK ræðurðu á hvaða vörunúmer í DK línurnar fara: Tímar, Akstur, Efni, Tæki og Verkfæragjald. Tómur reitur notar sjálfgefna númerið sem sést gráletrað í honum, til dæmis TIMAR. Sé VSK annar en 24% bætist hlutfallið aftan við númerið, til dæmis EFNI_11. Línur á tilboðsreikningum fara á sama númer og Efni. Sé varan ekki til í DK stofnar Unnur hana.

Regla, Konto og Uniconta

Veldu kerfið, fylltu út reitina og smelltu á Vista:

• Regla: Notendanafn og Lykilorð sem þú notar til að skrá þig inn í Reglu.
• Konto: Notendanafn og API lykill sem þú býrð til í Konto.
• Uniconta: Notendanafn, Lykilorð og Auðkenni fyrirtækis í Uniconta (Company ID). Auðkennið er númer fyrirtækisins í Uniconta, ekki kennitalan.

Catacloud

Veldu Catacloud og smelltu á Tengja við Catacloud. Skráðu þig inn í Catacloud, veldu fyrirtækið og samþykktu tenginguna. Hér er ekkert að vista.

Unnur sækir líka aðfangareikninga úr Catacloud einu sinni á sólarhring, svo ekki þarf að sækja um rafræna móttöku. Sjá Rafrænir reikningar.

Skiptirðu síðar úr Catacloud í annað bókhaldskerfi halda aðfangareikningarnir áfram að koma úr Catacloud. Viltu fá rafræna reikninga gegnum Unimaze í staðinn, sendu okkur línu á [email protected].

Tölvupóstur á bókara

Þetta er fyrir þá sem eru með bókhaldskerfi sem Unnur tengist ekki. Settu netfang bókarans í Netfang móttakanda og smelltu á Vista.

Tölvupóstur á bókara. Reikningarnir fara á netfangið sem skráð er hér.

Þegar reikningur er sendur fær bókarinn tölvupóst með töflu yfir línurnar, Excel-skjal, CSV-skrá, PDF-fylgiskjalið og önnur fylgiskjöl reikningsins. Svar við póstinum fer til þess sem sendi reikninginn. Bókarinn skráir reikninginn svo í bókhaldskerfið.

Algeng vandamál

„Stillingar fyrir bókhaldskerfi fundust ekki“

Ekkert bókhaldskerfi er tengt. Tengdu það eins og lýst er hér að ofan, eða notaðu Merkja sem sendan ef reikningurinn á ekki að fara í bókhaldskerfi.

„Verkkaupa verkefnis vantar kennitölu“

Reikningur er ekki sendur nema verkkaupinn sé með gilda kennitölu. Þetta gildir líka um Tölvupóst á bókara. Skráðu kennitöluna á verkkaupann og sendu aftur, sjá Verkkaupar.

„Ógildar auðkennisupplýsingar fyrir bókhaldskerfi“

Bókhaldskerfið hafnaði aðganginum. Farðu í Stillingar›Tengingar›Bókhaldskerfi.

• Payday: smelltu á Endurtengja við Payday. Hafirðu tengt með Client ID smellirðu á Breyta Client ID og Secret, setur inn nýtt Client Secret og vistar.
• Uniconta: þar byrjar villan á „Innskráning í Uniconta mistókst“. Notendanafnið eða lykilorðið er rangt. Settu inn rétt Notendanafn og Lykilorð og smelltu á Vista.

„Payday hafnaði reikningnum: fyrirtækið er ekki skráð með VSK-númer í Payday“

Farðu yfir VSK-stillingar fyrirtækisins í Payday og sendu reikninginn svo aftur.

„Ekki náðist samband við bókhaldskerfið“

Bókhaldskerfið svaraði ekki. Reyndu aftur eftir smástund. Reikningurinn helst í drögum þar til sendingin tekst.

Kerfið þitt er ekki á listanum

Sendu okkur línu á [email protected] og segðu hvaða kerfi þú notar. Á meðan geturðu notað Tölvupóst á bókara.