Akstur, ökutæki og akstursvörur

Til að hægt sé að skrá akstur þarf að minnsta kosti eitt ökutæki. Akstursvara er gjaldið, til dæmis kílómetragjald, og með henni reiknast upphæð ferðarinnar út frá magni. Hún er valkvæð: ef ökutæki hefur enga akstursvöru slær sá sem skráir inn upphæðina sjálfur.

Aðeins Stjórnandi og Skrifstofumaður sjá flipana Ökutæki og Akstursvörur undir Akstur. Hvernig ferðir eru skráðar sérðu í Skrá akstur.

Stofna ökutæki

1. Farðu í Akstur›Ökutæki og smelltu á + efst til hægri.
2. Skrifaðu Nafn, til dæmis tegund og bílnúmer. Starfsmenn velja bílinn eftir þessu nafni. Tvö ökutæki mega ekki heita það sama.
3. Smelltu á Búa til ökutæki. Síða ökutækisins opnast.

Flipinn Ökutæki. Plúsinn efst til hægri stofnar nýtt ökutæki.

Ef fyrirtækið á enga akstursvöru sést spjaldið Stofna akstursvöru um leið í glugganum og kveikt er á rofanum. Fylltu þá út Heiti akstursvöru, Einingarkóði og Einingarverð (án vsk.). Varan verður til og tengist bílnum. Slökktu á rofanum ef þið viljið frekar slá inn upphæð í hvert sinn.

Fyrsta ökutækið, með kílómetragjaldi sem er stofnað um leið

Séu fleiri en ein akstursvara til birtist taflan Akstursvörur neðst í glugganum og hakað er við þær allar. Taktu hakið af þeim sem eiga ekki við bílinn. Sé aðeins ein vara til tengist hún nýja bílnum án þess að tafla birtist.

Ökutæki verður ekki eytt

Ekki er hægt að eyða ökutæki, þótt Eyða sé í valmyndinni. Sé bíll hættur í notkun má breyta nafni hans með Breyta í sömu valmynd, til dæmis í „Kangoo RT318 (seldur)“, svo enginn velji hann fyrir mistök.

Stofna akstursvöru

1. Farðu í Akstur›Akstursvörur og smelltu á +.
2. Skrifaðu Nafn. Það sést þegar akstur er skráður og í línunni á sölureikningnum, til dæmis Kílómetragjald eða Innanbæjarakstur.
3. Veldu Einingarkóði: Kílómetri, Klukkustund, Stykki, Dagur, Ferð eða Krónur. Kílómetri hentar ef rukkað er eftir vegalengd, Stykki fyrir fast gjald á hverja ferð. Einingin Ferð birtist sem FRD í listunum, svo Stykki er skýrara.
4. Settu inn Einingarverð (án vsk.). Það verður að vera hærra en 0.
5. Í töflunni Ökutæki er hakað við öll ökutæki. Taktu hakið af þeim sem eiga ekki að fá vöruna og smelltu á Búa til akstursvöru.

Fast gjald fyrir ferð á Suðurnes. Kangoo-bíllinn fær það ekki.

Akstursvörurnar. Tengd ökutæki sýnir á hve marga bíla hver vara er tengd.

Mismunandi verð eftir bílum

Þegar ökutæki er valið í skráningu sjást aðeins akstursvörurnar sem tengdar eru því. Þannig má hafa eitt kílómetragjald fyrir minni bílana og annað fyrir stóra sendibílinn: tvær akstursvörur, hvor tengd sínum bílum.

Smelltu á ökutæki í listanum til að sjá hvaða akstursvörur eru tengdar því. Spjaldið Akstursvörur sést þar aðeins ef fyrirtækið á fleiri en eina akstursvöru. Tengingunum breytirðu í Breyta í þriggja punkta valmyndinni, hvort sem er á ökutækinu eða akstursvörunni. Taflan með hökunum birtist þar ef til eru fleiri en ein akstursvara (á ökutæki) eða fleiri en eitt ökutæki (á akstursvöru).

Stóri sendibíllinn er tengdur þremur akstursvörum, þar á meðal eigin kílómetragjaldi.

Hökin vistast strax

Í glugganum Breyta vistast hvert hak um leið og þú smellir á það. Hætta við afturkallar það ekki.

Breytirðu Einingarverð (án vsk.) á akstursvöru gildir nýja verðið um ferðir sem eru skráðar eftir það. Eldri ferðir halda sínu verði nema þeim sé breytt, sjá Skrá akstur.

Eyða akstursvöru

Veldu Eyða í þriggja punkta valmynd akstursvörunnar og staðfestu. Varan hverfur þá af öllum ökutækjum. Ferðir sem voru skráðar á hana halda magni og upphæð, en heiti vörunnar hverfur úr listunum. Fari slík ferð á reikning fær línan aðeins heiti ökutækisins í Lýsing. Eigi varan bara ekki lengur við einn bíl er nóg að taka hakið af honum, sjá Mismunandi verð eftir bílum.

Tengt efni

Skrá aksturSkrá ferðir í vefnum, með tímum og í appinu.

Akstur á sölureikningHvernig aksturinn fer á reikninginn.